सीमामा शान्ति कायम राख्न र मिलेर अघि बढ्न चीन-भारत सहमत

ब्रिक्स सम्मेलनमा चिनियाँ राष्ट्रपति र भारतीय प्रधानमन्त्रीबीच भेटवार्ता

२० भदौ, रौतहट । डोक्लाम विवादपछि पहिलोपटक चिनियाँ राष्ट्रपति शी जिनपिङ र भारतीय प्रधानमन्त्री नरेन्द्र मोदीबीच भेटवार्ता भएको छ । ब्रिक्स सम्मेलनको क्रममा उनीहरुबीच भेटवार्ता भएको हो ।

भारतीय विदेश मन्त्रालयका अनुसार उनीहरुबीच करिब एक घण्टा भेटवार्ता भएको छ । सो भेटमा शी जिनपिङ र नरेन्द्र मोदी दुबै सीमा क्षेत्रमा शान्ति कायम राख्न र मिलेर अघि बढ्न सहमत भएका छन् ।

दुबै नेताहरुबीच फेरि डोक्लामको जस्तो तनावको अवस्था पैदा नहोस् भन्ने सहमति बनेको छ । विवादलाई आपसी छलफलबाट सुल्झाउन पनि चीन र भारत सहमत भएका छन् ।

भारतीय विदेश सचिव एस जयशंकरले भनेका छन्, ‘हामीहरुबीच प्रगतिशील दृष्टिकोण छ । दुबै देशलाई थाहा छ अतितमा के भएको थियो । तर यो विगतको कुरा गर्ने बैठक थिएन ।’

उनीहरुबीच ब्रिक्स सम्मेलनका मुद्दाबारे पनि छलफल भएको थियो । ब्रिक्सलाई अझै सान्दर्भिक बनाउने र दुबै देशबीचको सम्बन्ध स्थीर र सौहाद्र बनाउने सहमति भएको छ ।

मोदीले चिनियाँ राष्ट्रपति शीलाई बि्रक्स सम्मेलनको सफल आयोजनाका लागि बधाइ समेत दिएका थिए ।

चीनको शियानमेनमा आयोजित तीन दिने ब्रिक्स शिखर सम्मेलनको आज अन्तिम दिन हो ।